Luk 2 | BMU | STEP | Jon O-melun azinöŋ ahuiga nalö miaŋgöreŋ sisa kiŋ Ogastus yaŋön Rom sitinöŋ gölmeŋi gölmeŋi galöm köl eŋgiyök. Galöm köl eŋgiba takis könahiba memegöra gawmangö jimkutukutu aliga gölmeŋi gölmeŋi pakpak yeŋön tokogetka kuskus (sensus azi) yeŋön qetŋini papianöŋ ohoba areŋgöget.

a21Lew 12.3, Luk 1.31

b22-24Lew 12.6-8;

c23Eks 13.2,12

d32Ais 42.6, 49.6, 52.10

e39Mat 2.23

g41Eks 12.1-27, Dut 16.1-8;

h521 Sml 2.26, Qam 3.4

Luke 2

Jisös Betlehem taonöŋ ahuyök.

Mat 1.18-25

1 Jon O-melun azinöŋ ahuiga nalö miaŋgöreŋ sisa kiŋ Ogastus yaŋön Rom sitinöŋ gölmeŋi gölmeŋi galöm köl eŋgiyök. Galöm köl eŋgiba takis könahiba memegöra gawmangö jimkutukutu aliga gölmeŋi gölmeŋi pakpak yeŋön tokogetka kuskus (sensus azi) yeŋön qetŋini papianöŋ ohoba areŋgöget.

2 Areŋ nup mi nalö mutukŋa meget. Megeri, nalö miaŋgöreŋ azi qetŋi Qirinius yaŋön Siria prowinsgö premiö mala galöm köl eŋgiyök. 3 Ogastusnöŋ jimkutukutu aliga ambazip körek pakpak yeŋön öröba anda qetŋini areŋnöŋ ohomegöra nanŋini ahuahu miri bohonŋini dop anget.

4 Galili prowinsgö taon qetŋi Nazaret miaŋgöreŋ azi qetŋi Josef malök. Yaŋgö amböŋi mi kiŋ Deiwid. Kiŋ Deiwidkö taonŋi qetŋi Betlehem mi Judia prowinsnöŋ ahöyök. Miaŋgöra Josefnöŋ Nazaret mosöta öŋgöba geba Betlehem anök. 5 Anmam jiiga nalö miaŋgöreŋ ambi buŋaŋi qetŋi Marianöŋ gölömŋambuk malök. Maliga i auaŋgita qetŋiri ohomegöra mohotŋe anohot.

6 Anda Betlehem aŋgorohotka Mariagö morö meme nalöŋan kam kuŋguyök. 7 Kam kuŋguiga qenjarök ahöahö mire aŋgota miaŋgö uruŋe tiŋi qahö miwikŋaiyohot. Miaŋgöra bau bulmakau miriŋe öŋgöba tarohot. Tata miaŋgöreŋ nahönŋi mutukŋi memba oponöŋ esuhuba bulmakau joutŋe ali geba ahöyök. Mewö.

Lama galöm yeŋön Suep garata eŋgeket.

8 Betlehem taon gölme miaŋgöreŋ azi tosatŋan suŋgem dop gölme köröŋi miaŋgöreŋ anda lama kambuŋini galöm köl eŋgiba malget. 9 Mewö malgetka suŋgem miaŋgöreŋ Kembugö garata kunŋan kösutŋine asuhum eŋgiyök. Asuhum eŋgiiga Kembugö asakmararaŋan liliköm eŋgiba asariiga qem sömbuŋini möta jönömŋini unduyök. 10 Jönömŋini unduyökmö, Suep garatanöŋ jii mötket, “Mönö kezap alget. Nöŋön sösöŋgai Buŋa ketaŋi ambazip körek pakpak yeŋgöra memba kazal, mi indel eŋgimam. Miaŋgöra jönömŋini kude unduma. 11 Buŋa mi kewö: Eŋgö Amötqeqe Toŋinan dölki ahuza. Yaŋön kiŋ Deiwidkö taonöŋ asuhuba Kembu qetŋi Kraist akza. 12 Keu miaŋgö aiwesökŋi kewö: Iŋini anda morö sepsep oponöŋ esuhuba bulmakau joutŋe alget ahözawi, mi miwikŋaime.”

13 Garatanöŋ mewö jiiga miaŋgöreŋök garata kambu ketaŋan Suepnöhök kaŋgota yambuk aitoŋgöba Anutugö möpömöpösei liŋet köla kewö jiget,

14 “Anutugö qetbuŋaŋi möpöseininga Suepnöŋ euyaŋgöreŋ öŋgöza.
Yaŋön ambazip nanŋaŋgöra meköm eŋgiyöhi, yeŋgöra körö ölöwak möta gölmenöŋ luai al eŋgiza.” Mewö.

Lama galöm yeŋön anda Jisös eket.

15 Garata yeŋön eŋgömosöta Suepnöŋ liliŋgöba öŋgögetka lama galöm yeŋön naninak kewö jiget, “Ayop, Betlehem miaŋgöreŋ yuai ahuiga Kembunöŋ miaŋgö keuŋi jii mötzini, nini mönö mia anda ekin.”

16 Mewö jiba ösumŋinan anda Maria Josef aka morösepsep bulmakau joutŋe ahöyöhi, miwikŋaiba eket. 17 Eka kinda garatanöŋ morögöra keu jii möta kageri, mi indela jim asariget. 18 Jim asarigetka mötkeri, yeŋön körek pakpak auruba welipköget.

19 Welipkögetmö, Marianöŋ keu pakpak mi uru könömŋe ala dumgöba jöhöba könaŋi mötmöriba malök. 20 Welipkögetmö, yuai pakpak Suep garatanöŋ jiyöhaŋgö dop asuhuyöhi, mi lama galöm yeŋön eka möta miaŋgöra Anutugö sösöŋgai liŋet köla möpöseiget. Möpöseiba mosöta liliŋgöba anget. Mewö.

Morö qetŋi Jisös qetket.

21 Jisös ahui Sonda mohot miaŋgö dop teköiga Anutugö aiwesökŋi sileŋe yandibingö nalöŋi kaiga qetŋi Jisös qetket. Suep garatanöŋ qet mi mutuk qeta waŋgiigun nalö miaŋgöreŋök namŋaŋgö gölöm uruŋe ahuyök. Mewö. ^a

Jisös waŋgita Anutugö buŋaya alget.

22 Mosesgö Köna keunöŋ keu kewö ahöza, “Ambinöŋ morö nahönŋi mutukŋi memba silim 40 koumŋe mali teköiga sörö guluŋi köl könjörat waŋgiba iŋini mönö jöwöwöl jikenöŋ öŋgöba morö mi Anutugö jeŋe algetka yaŋgö buŋaya akŋa.” Miaŋgöra nalö mi kam kuŋguiga Josef Maria yetkön keu mi tem köla Jisös waŋgita Kembugö buŋaya akŋapköra Jerusalem öŋgöyohot.

23 Kembugö Köna keunöŋ keu kewö ohoget ahöza, “Morö nahön pakpak sep mutuk mokozei, mi mönö Kembugö buŋaya akŋapköra qem teköba mem sarahime.” Yetkön keu mi wuataŋgöyohot. 24 Mewöyök Kembugö Köna keunöŋ jimkutukutu keu ahözawaŋgö dop kembö me kembö supsup nei yahöt mi jöwöwöl ohomahotköra Jerusalem sitinöŋ öŋgöba anohot.

25 Nalö miaŋgöreŋ azi kun qetŋi Simeon Jerusalem malök. Yaŋön uruŋi jömuk Anutugöreŋ qekötahöba urumeleŋgö kölguliguli aiga Uŋa Töröŋan yambuk kiniga Amötqeqe Toŋan Israel uruŋe asuhumapköra mamböta malök. 26 Mamböta maliga Uŋa Töröŋan keu kewö indeli mörök, “Gi Kembugö Amötqeqe Toŋi Kraist ahui mutuk ekagun kömupkö sihimbölöŋi mötman.” 27 Iwinamŋan Mosesgö Köna keu wuataŋgöba Jisös waŋgita jöwöwöl jikenöŋ öŋgöyohot. Öŋgöyohotka Uŋa Töröŋan Simeon sölölöhöi nalö miaŋgöreŋök mewöyök jikenöŋ öŋgöyök. 28 Öŋgöba morö mi eka memba dohongöba Anutu möpöseiba kewö jiyök, ^{b
,} ^c

Simeongö sösöŋgai liŋet

29 “O Kembu, merak welen azigan ölöp anda uruluainöŋ mala kömuma.

30 Göhö keugahö dop Amötqeqe Toŋi melainöŋ asuhuiga i nani jenan

eka simbawoŋ mötzal.
Miaŋgöra ölöp anda kömumam.
31 Göŋön amötqeqegö könaŋi mözözömgöba kantri pakpak yeŋgöra indel eŋginöŋga mi eka möt kutume.
32 Göŋön Amötqeqe Toŋaŋgö asakŋi indelnöŋga kian kantri yeŋgö

uruŋini kuŋguiga asarime
aka qetbuŋagan nangi könagesögi Israel neŋgö sutnine mewöyök qarima.” ^d

Simeongö kezapqetok keu

33 Simeonöŋ morögöra keu mewö jiiga iwinamŋan möta köŋkuŋ aka welipköyohot. 34 Welipköyohotka kötuetköm eŋgiba namŋi Maria kewö jii mörök,

“Mötnöŋ, Anutunöŋ morö ki kuŋguba ali Israel ambazip sehisehiŋan i andö qeba eta eŋgugetka
gwötpukŋan uruŋini meleŋda ölöwakŋe.
Anutunöŋ nanŋak i ali aiwesök aiga gwötpukŋan i tuaköpek jim waŋgime.
35 Tuaköpek jim waŋgigetka urumötmötŋini asa-asambötŋan mewö aukŋe asuhuma.
Nangi urugan mewöyök wösöbirik aiga miaŋön sou zuluk alalŋi ewö urugi kuŋguba qesiŋma.” Mewö.

Ana ambigö kezapqetok keu

36 Jerusalem miaŋgöreŋ kezapqetok ambi namŋi kun qetŋi Ana malök. Yaŋgö isikŋi qetŋi Aser, iwiŋi qetŋi Fanuel. Ambi miaŋön seramŋe azi memba mali yambu (yara) 7 mohotŋe malohot. 37 Malohotka apŋi kömui malö aka mala kori nalö miaŋgöreŋ yambuŋi 84 ahök. Yaŋön nalö dop jöwöwöl jikenöŋ öŋgöba mi silim kun qahö mosörökmö, suŋgem asak Anutugöra nene siŋgi mala köuluköba waikŋi memba möpöseiba malök.

38 Yaŋön nalö miaŋgöreŋök kaŋgota morö mi eka Anutu möpöseiyök. Anutunöŋ Jerusalem ambazip sohopŋini memapköra mamböta malgeri, körek yeŋgöra morö miaŋgö könaŋi jim asarii mötket. Mewö.

Jisösbuk Nazaret liliŋgöget.

39 Josef Maria yetkön Kembunöŋ areŋi jim kutuiga Köna keunöŋ ahözawi, mi körek ahot teköiga Galili prowinsnöŋ liliŋgöba taonŋiri Nazaret miaŋgöreŋ anohot. 40 Morönöŋ qariba wahöta köhöiba mötkutukutuŋi ahuba kokolak qeiga Anutugö kalem möriamŋan qakŋe öŋgöi kinök. ^e

Jisös yaraŋi 12 aiga jöwöwöl jikenöŋ öŋgöget.

41 Jisös iwinamŋan yambu (yara) dop ak-kömukömu ^{▼▼Anutunöŋ Ijipt miaŋgöreŋ Israel ambazip eŋgehoriba eŋgoŋgiröhi, ak-kömukömu kendon miaŋgö qetŋi kun Pasowa.} kendon nalöŋe Jerusalem siti öŋgöba anjahotma. 42 Mewö mala Jisös yambu (yara)ŋi 12 aiga silikŋini ahakzeaŋgö dop nalöŋi kam kuŋguiga mewöyök öŋgöba anget. 43 Anda mala kendon nalö miaŋön teköiga liliŋgöba miriŋire anohot. Anohotmö, morö gwabö Jisösnöŋ Jerusalem tari iwinamŋan mi qahö möt kutuyohot. 44 “Yaŋön ambazip kambu yembuk anja,” jiba silim mohotkö dop köna anda sepkitip aka alaurupŋiri yeŋgö uruŋine qeta jaruyohot. 45 Qeta jaruyohotmö, qahö miwikŋaiba kunbuk liliŋgöba Jerusalem anda jaruyohot.

46 Jaruba malohotka silim karöbut teköiga jöwöwöl jikenöŋ öŋgöba miaŋgöreŋ miwikŋaiyohot. Miwikŋaiyohotka azi ketaŋi yeŋgö sutŋine tarök. Tari kusum waŋgigeri, mi möta qesim eŋgiba tarök. 47 Tata Buŋa keugö könaŋi törörök möt asariba diŋdiŋanök meleŋniga körek pakpak yeŋön mi möta welipköget. 48 Iwinamŋan eka auruba namŋan jii mörök, “Nahöni, gi denöwögöra mewö ak netkizan? Mötnöŋ, niri iwigabuk göhöra waimanjat möta qeta jaruba malit.”

49 Mewö jiiga kewö meleŋ etkiyök, “Iŋiri mönö wuanöŋgöra ni göraim niŋgizahot? Ni Iwinaŋgö mire tatpi dop kölja, mi mötzahot me qahö?” 50 Mewö meleŋ etkiyökmö, yetkön keu jiyöhi, miaŋgö könaŋi mi qahö möt asariyohot.

51 Qahö möt asariyohotmö, töndup wahöta yetpuk liliŋgöba Nazaret taonöŋ anda iwinamŋi tem köl etkiba malök. Jisösnöŋ keu jiyöhi, namŋan mi pakpak möta urukönömŋe ala jöhöba aŋgön kölök. 52 Jisösnöŋ mala qarii yambu (yara)ŋi öŋgöiga mötkutukutuŋi asariba sehiiga Anutunöŋ kalem möriamŋi waŋgii köhöiba ambazip aka Anutu yeŋgö jeŋine dop köl eŋgiyök. Mewö. ^{g
,} ^h